आपल्या घरी, घरी घरातच रहा.
© चन्द्रहास शास्त्री सोनपेठकर
हरवलाय मैत्रीचा कडक चहा
घरीच एकमेकांकडे एकटक पहा
घर सारखं सारखं आवरत रहा
आपल्या घरी, घरी घरातच रहा.
ऑनलाईनचे तास वाढलेत
ऑनस्क्रीनचे त्रास वाढलेत
काढ्यांवर दिवस काढलेत
व्हाॅटसॅपवरचे संदेश पहा.
आपल्या घरी, घरी घरातच रहा.
रटाळवाण्या त्या सिरिअल्स
बातम्या तर अति सिरिअस
होऊन एक नंबरचे क्युरिअस
फेसबुक ट्विटर उघडून पहा
आपल्या घरी, घरी घरातच रहा.
टिफिनचं काय घेऊन बसलात
फिलिंग शेअरींगच कमी झालंय.
शेअरींगचं काय घेऊन बसलात
फिलिंगच तर कमी झालंय पहा.
आपल्या घरी, घरी घरातच रहा.
ती करते रोज नवा पदार्थ खायला
तो आपला आहेच लुडबुड करायला
कंटाळलो आता सारखं हात धुवायला
खिडकीतून शून्य रस्ता तरी पहा
आपल्या घरी, घरी घरातच रहा.
घुमतात सतत सायरनचे आवाज
रटाळ चाललंय घरून कामकाज
आरशातच करावा स्वतःवर नाझ
वजन वाढलंय की उतरलंय पहा
आपल्या घरी, घरी घरातच रहा.
(कविता कवीच्या नामोल्लेखासह पुढे पाठवू शकता.)
No comments:
Post a Comment