नामाची गोडी
© चन्द्रहास।
ओवाळूनी टाकावे जन्म हजार
नामाची गोडी त्याहूनी अपार।
सुखाचे उत्सव, दुःखाचे उत्सव
करीतसे माझा हा पंढरीराव।।
जळे पाप सारे, होता गुरुभेट
भवसागरी बेट, विठोबा माझा।
करावे तयाचे भजन रात्रंदिनी
मन होय विशुद्ध संतचरणी।।
जय श्रीकृष्ण!
कृपा लाभतां...
© चन्द्रहासः।
करीशी मना सांग चिंता कशाला
तुझी काळजी वाहण्या ती समर्था।
जगाची असे पालिका एकवीरा
तिचे पादपद्मी तुझा रे निवारा॥
नसे वा असे वा दुजे अन्य कोणी
परी माय सांभाळिते लेकरासी।
कितीदा जरी चूक केलीस तू रे
करीते क्षमा ती तुला लेकरासी॥
अगाधाचि लीला तिची काय वर्णू
असे याचकां माय ती कामधेनू।
तिला मागता व्यर्थ ना होतसे रे
तिचे पादपद्मी तुझे लाड सारे॥
जगाची असे स्वामिनी अंबिका ती
तिचे नाम ते सर्वदुःखान्तकारी।
तिचे नाम ते सर्वभीत्यन्तकारी
तिचे नाम घेई सुखां पात्र होई॥
तिचे नाम घेतां रिपू दूर जाई
तिचे नाम घेतां जगी मान्य होई।
तिचे नाम घेतां स्वये लाभ येई
तिचे नाम घेतां स्वये स्वस्ति होई॥
कृपा लाभतां नाम ओठात येई
कृपा लाभतां नाम चित्तात येई।
कृपा लाभतां सिद्धि कार्यात येई
कृपा लाभतां हास तो धन्य होई॥
