"आई, मज तूच तू दिसशी"

"आई, मज तूच तू दिसशी"

करंगळी तू हाती धरीशी
आई मज, हिताशी नेईशी

जिकडे पहावे तिकडे आई
मज तूच अन तूच दिसशी
नाही अन्य तत्त्व जाणिवेशी
आई, मज तूच तू दिसशी

स्वर्णकान्ती तुझी झळकती
सिंहावर तू आरूढ झालीशी
हाती आयुध बहु तू धरीशी
आई, मज तूच तू दिसशी

नाही भिती नाही चिंता उराशी
नाही तमा, नाही भीड कोणाशी
किती सुंदर तू माते हसशी
आई, मज तूच तू दिसशी

नाही मागणे काही या जगाशी
हिशेब नाही बाकी जगाशी
तू कल्पवल्ली, मी तुजपाशी
आई, मज तूच तू दिसशी

समजावून नाही समज कोणाशी
जन अडकून बैसती पाशाशी
नाही तुझी कृपा, माये तयापाशी
आई, मज तूच तू दिसशी

अर्पावे शीरकमल तुझे पायाशी
घेशी लेकरां कवटाळुन हृदयाशी
नको विस्मर, रेणुके क्षणाशी
आई, मज तूच तू दिसशी

‍‍‌卐 चन्द्रहास卐